កសិកម្មនៅកម្ពុជា: ពូជស្រូវក្រអូប 'ផ្ការំដេង'

ពូជស្រូវ 'ផ្ការំដេង' ជាពូជស្រូវក្រអូបដែលបានធ្វើការរំដោះ និងផ្សព្វផ្សាយដោយវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា នាចុងឆ្នាំ ២០០៦ ។ បច្ចុប្បន្នជូជស្រូវក្រអូបបាននឹងកំពុងពេញនិយមក្នុងចំណោមប្រជាកសិករ នៅក្នុងព្រះរាជាណាចក្រកម្ពុជា ។ ពូជស្រូវ 'ផ្ការំដេង' នេះផ្តល់នូវទិន្នផលខ្ពស់ គុណភាពអង្ករល្អ មានភាពថ្លាវែងរលូន បាយទន់ឆ្ងាញ់ ថែមទាំងមានក្លិនក្រអូបទៀតផង ។ ជាពិសេសទៅទៀត ជាពូជដែលមានប្រភេទអង្ករមានតម្លៃខ្ពស់នៅលើទីផ្សារជាតិ និងអន្តរជាតិ ។

លក្ខណៈពិសេសៗរបស់ពូជស្រូវ 'ផ្ការំដេង'

ពូជ 'ផ្ការំដេង' ជាពូជស្រូវដែលមានវេទរសនឹងរយៈពន្លឺ (ប្រកាន់រដូវ) មធ្យម ។ វាចាប់ចេញផ្កាក្នុងអំឡុងថ្ងៃទី ១៥ - ២៥ ខែតុលា អាស្រ័យទៅលើអាកាសធាតុ និងពេលវេលាដាំដុះ ។ កម្ពស់ដើមរបស់ពូជផ្កា 'រំដេង' ប្រែប្រួលពី ៨០-១៧៥ ស.ម និងចំនួនដើមបែកផ្តល់ផល គឺចាប់ពី ៨-២០ ដើម ក្នុងមួយគុម្ព អាស្រ័យទៅតាមប្រភេទដី ។ ចំនួនគ្រាប់ក្នុងមួយគួរមានចាប់ពី ១១០-១៥០ គ្រាប់ និងមានប្រវែងកួរ ១៩-៣១ ស.ម ។ រីឯទិន្នផលរបស់វាវិញ គឺអាចទទួលបានចាប់ពី ៣.៥ តោន ទៅ ៥.៨ តោន ក្នុងផ្ទៃដី ១ ហិកតា ។

វិធីសាស្តដាំដុះ

សម្រាប់ស្រូវសន្ទូង បរិមាណគ្រាប់ពូជដែលចាំបាច់គីពី ៣០-៤០ គីឡូក្រាម ក្នុងមួយហិកតា ប៉ុន្តែករណីដែលគ្រាប់ពូជសុទ្ធ និងមានសុខភាពល្អ បរិមាណគ្រាប់ពូជដែលត្រូវការក្នុងមួយហិកតាគឺពី ១៥-២០ គីឡូក្រាម ប៉ុណ្ណោះ ។ ទីសំណាបត្រូវធ្វើនៅជិតប្រភពទឹក តែត្រូវឆ្ងាយពីម្លប់ព្រៃ ឬកន្លែងមានភ្លើងអគ្គិសនី ដើម្បីចៀសវាងការបំផ្លាញពីសត្វល្អិតចង្រៃ ។ ផ្ទៃដីសម្រាប់សាបគឺ ១ គីឡូក្រាម ក្នុងផ្ទៃដី ១០ ម៉ែត្រការ៉េ ។ ជាការល្អ គួរស្ទូងសំណាបដែលមានអាយុ ២៥-៣០ ថ្ងៃ ហើយក្នុងមួយគុម្ព ២-៣ ដើម ។ សម្រាប់ស្រូវពង្រួស បរិមាណ គ្រាប់ពូជដែលចាំបាច់គឺ ៧០-៨០ គីឡូក្រាម ក្នុងមួយហិកតា ។ គួររៀបចំដីឲ្យបានល្អ និងរាបស្មើមុនស្ទូង ឬព្រួស ។ ការភ្ជួររាស់ គួរតែធ្វើឲ្យបាន ២-៣ សារ ជាការប្រសើរ ។ ប្រសិនបើស្រែយើងអាចបញ្ចូលញទឹកបាន បន្ទាប់ពីស្ទូងបាន ២០ថ្ងៃ យើងអាចបញ្ចេញទឹកឲ្យអស់ពីក្នុងស្រែចំនួន ២-៤ ថ្ងៃ រួចបញ្ចូលទឹកថ្មីវិញ ធ្វើរបៀបនេះគឺដើម្បីឲ្យស្រូវបែកគុម្ពបានល្អ ។

ការប្រើប្រាស់ជី

ការប្រើប្រាស់ជីសមស្របតាមកម្រិតណែនាំ នឹងមិនបណ្តាលឲ្យមានការថយចុះ ឬបាត់បង់ក្លិន ឬគុណភាពដទៃទៀតឡើយ ។ គួរដាក់ជី ២-៣ ដងក្នុង ១ វដ្តជីវិតរបស់ស្រូវ ដោយ ៖

- បាចលើកទី ១៖ ទ្រាប់បាតមុនពេលស្ទូង ប្រើជីធម្មជាតិពី ៥-១០ តោន ក្នុងមួយហិកតា និងរួមផ្សំជាមួយជីគីមីដូចមានក្នុងតារាងទី១ ។ សម្រាប់ពេលវេលានៃការបាចជីលើកទីមួយ និងលើកទីពីរធ្វើឡើងទៅតាមពេលវេលាសាបដូចមានបង្ហាញនៅក្នុងតារាងទី ២ ។

តារាងទី ១

ប្រភេទដី	បាចទ្រាប់បាត			បំប៉ន
	ប្រភេទជី			លើកទី ១	លើកទី ២
	អ៊ុយរ៉ឹ	ដេ អា ប៉េ	ប៉ូតាស្យូម	អ៊ុយរ៉េ	អ៊ុយរ៉េ
ដីព្រៃខ្មែរ	៦-៨	១៧-២៥	០-៦៧	១៧-២៤	១៣-១៨
ដីប្រទះឡាង	២-១៣	៥០	០-៥០	២៩-៤៣	២២-៣៣
ដីបាកាន ឬ អូរូង	២៤	៣៨	០-៣៥	៥២	៣៩
ដីទួលសំរោង	២០-៣៥	៥០	០	៥៣-៨៥	៤០-៦៤
ដីក្រគរ	៥៩	៥០	០	១០៤	៧៨
ដីគោកត្រប់	១២	៥០-៦៧	០-៥០	៤៣-៥០	៣២-៣៨
ដីក្បាលពោធិ៍	៥២	០	០	៧០	៥២
ដីកំពង់សៀម	៣៣	០	០	៤៣	៣៣

តារាងទី ២

ពេលវេលាសាប	បំប៉នលើកទី ១	បំប៉នលើកទី ២
១-៣១ មិថុនា	៣០ ថ្ងៃក្រោយស្ទូង	៨-១២ កញ្ញា
១-១៥ កក្កដា	៣០ ថ្ងៃក្រោយស្ទូង	១៣-១៧ កញ្ញា
១៦-៣០ កក្កដា	៣០ ថ្ងៃក្រោយស្ទូង	១៨-២២ កញ្ញា

ការប្រមូលផល និងទុកដាក់

ត្រូវធ្វើការច្រូតកាត់នៅរវាង ៣០-៣៥ថ្ងៃ បន្ទាប់ពីស្រូវហាលផ្កា ស្រុះ ឬពេលដែលប្រមាណ ៨៥ ភាគរយ នៃគ្រាប់ស្រូវទុំ ។

ត្រូវហាល ២-៣ ថ្ងៃដើម្បីបន្ថយសំណើមនៅក្នុងគ្រាប់ឲ្យនៅ ១៤ ភាគរយ មុននឹងទុកជាការល្អ ។ សូមយកគ្រាប់ស្រូវមកខាំដើម្បីកំណត់ បើគ្រាប់ស្រូវនោះបាក់ គឺមានន័យថាគ្រាប់ស្រូវស្ងួតល្អអាចទុកដាក់បាន ។
គ្រាប់ពូជ ត្រូវទុកនៅក្នុងក្រចៅដាច់ដោយឡែកពីគ្រាប់ស្រូវចំណី នៅកន្លែងដែលស្ងួតល្អ ហើយគ្មានការបំផ្លាញពីសត្វកណ្តុរ មាន់ ទា ជាដើម ។ ត្រូវសរសេរឈ្មោះពូជ និងថ្ងៃខែច្រូតកាត់ដាក់នៅលើបាវឲ្យបានត្រឹមត្រូវល្អ ។
ផលស្រូវដែលប្រមូលបាន ត្រូវទុកដាក់ក្នុងជង្រុកឲ្យបានល្អដោយការពារកុំឲ្យសត្វកណ្តុរ មាន់ ទា ចូលស៊ី និងមិនឲ្យទទឹក ។

កសិកម្មនៅកម្ពុជា

Monday, February 27, 2017

ពូជស្រូវក្រអូប 'ផ្ការំដេង'

No comments:

Post a Comment