ខាងក្រោមនេះគឺជាឯកសារមួយចំនួនដែលរៀបរាប់ពីការកំណត់ដោយអ្នកទិញនៅចិន
មុនពេលដែលយើងអាចនាំស្វាយចូលស្រុកគេ (ចិន) បាន។
សូមបញ្ជាក់ថាអ្វីដែលលោកអ្នកនាងមិត្តអ្នកអានទាំងអស់នឹងអាននៅពេលបន្តិចទៀតនេះ
គឺមានសារៈសំខាន់់ខ្លាំងណាស់ សម្រាប់អ្នកណាម្នាក់ដែលមានបំណងចង់នាំចេញស្វាយទៅកាន់ប្រទេសចិន។
* រុយដែលបង្កឲ្យផ្លែឈើខូច : ខាងក្រៅល្អមើលទៅធម្មតាតែខាងក្នុងបែរជាមានសភាពរលួយ
ឬ មានសភាពរលួយដោយកន្លែងក្នុងសាច់របស់ផ្លែស្វាយ, រលួយផ្នែកក្បាល
ឬ តួរបស់ផ្លែស្វាយជាំដោយកន្លែងលើសំបកផ្លែស្វាយ ទាំងអស់នេះគឺជាសញ្ញាបញ្ជាក់ថា
ស្វាយនោះត្រូវបានឆ្លងមេរោគពីរុយផ្លែឈើ (Fruit Fly) ដែលបានចម្លងរោគនោះមកផ្លែស្វាយនៅពេលណាមួយដែលយើងមិនបានដឹង។
ផ្លែស្វាយដែលឆ្លងរោគពី Fruit Fly គឺជាបញ្ហាមួយយ៉ាងធំសម្រាប់អ្នកដាំស្វាយ
ព្រោះវាបានធ្វើឲ្យផ្លែស្វាយខូចស្ទើរ 70
ភាគរយនៃចំនួនផលដែលទទួលបាន ជួនកាលចំនួនខូចខាតដោយ Fruit Fly អាចច្រើនជាងនេះ។ អ្នកទិញស្វាយពីយើងគេខ្លាចណាស់ចំពោះផ្លែស្វាយដែលមានបញ្ហាបែបនេះ
ហេតុនេះហើយបានជាអ្នកទិញស្វាយពីយើងគេតម្រូវឲ្យអ្នកលក់ត្រូវធ្វើការមួយចំនួនដើម្បីធានាថា
ផ្លែឈើនោះត្រូវបានសម្លាប់មេរោគឆ្លងមកពី Fruit Fly ជាមុនសិន
មុនពេលដែលគេព្រមទិញស្វាយពីយើងយកទៅលក់នៅស្រុកគេ។
របៀបដែលគេដោះស្រាយបញ្ហានេះ អាចមានការលំបាកបន្តិច
ប៉ុន្តែវាធានាបានថា ស្វាយនោះវានឹងមិនមានជំងឺជាប់ទៅជាមួយឡើយ។ អាថ៌កំបាំងនៃការកំចាត់ជំងឺក្នុងផ្លែស្វាយ
ត្រូវបានគេបញ្ចេញឲ្យដឹងសម្រាប់ម្ចាស់ចំការស្វាយធំៗ ដែលជាសមាជិករបស់សហគមអ្នកដាំស្វាយសម្រាប់នាំចេញប៉ុណ្ណោះ។
ផ្នែកគ្រប់គ្រងគុណភាពផ្លែឈើនាំចូលទៅប្រទេសចិនបានកំណត់ថា ផ្លែឈើនាំចូលទៅប្រទេសគេគឺគ្មានរោគបង្កដោយ
Fruit Fly ជាដាច់ខាត ដូច្នេះស្វាយសម្រាប់នាំចេញទៅប្រទេសចិនត្រូវធ្វើដូចខាងក្រោមនេះ
(ឯកសារនេះត្រូវបានផ្តល់ឲ្យទៅប្រទេសមួយនៅអាស៊ីយើងដែរ ដែលជាអ្នកនាំស្វាយចេញទៅចិនច្រើនជាងគេ)
១-
ផ្លែស្វាយដែលបេះបានមកហើយត្រូវដាក់ត្រាំក្នុងទឹកស្អាត គ្មានមេរោគ ផ្លែស្វាយណាអណ្តែតត្រូវស្រង់ចេញព្រោះវានៅខ្ចី
ផ្លែស្វាយណាចាស់ត្រឹមត្រូវល្អវាលិចទៅក្រោម យើងត្រូវស្រង់យកស្វាយដែលលិចចុះក្រោមនោះមកជូតជាមួយក្រណាត់ស្បៃស្អាតដោយថ្នមៗ
ដៃរបស់យើងត្រូវពាក់ស្រោមដៃដែរការពារការឆ្លងមេរោគមិនល្អទៅស្វាយ។
២-
ស្វាយដែលបានជូតសំអាតរួចត្រូវយកទៅដាក់ត្រាំក្នុងទឹកក្តៅក្នុងកំដៅ
48 ដឺក្រេ សម្រាប់សំបកខាងក្រៅ 46
ដឺក្រេសម្រាប់សាច់ខាងក្នុង យើងត្រូវមាន Sensor សម្រាប់វាស់កំដៅទឹកឲ្យនៅស្មើក្នុងកំដៅ
48 ដឺក្រេជានិច្ច និងមាន Sensor កំដៅមួយទៀតសម្រាប់ស៊កចូលទៅក្នុងសាច់ស្វាយដើម្បីឲ្យប្រាកដថាសាច់ខាងក្នុងផ្លែស្វាយទទួលបានកំដៅ
46 ដឺក្រេជាក់លាក់។
ផ្លែស្វាយនីមួយៗត្រូវដាក់ត្រាំក្នុងទឹកក្តៅ 48
ដឺក្រេ និងលិចចុះទៅក្នុងទឹកក្តៅនោះឲ្យបាន 10
សង្ទីម៉ែត្រ ដោយប្រើរយៈពេល 38 នាទីសម្រាប់ផ្លែស្វាយដែលតូច
ឬ ខ្នាតមធ្យម ឯផ្លែដែលធំត្រូវត្រាំក្នុងទឹកក្តៅនោះចំនួន 53 នាទីជាកំណត់។ ការធ្វើបែបនេះគឺដើម្បីសម្លាប់មេរោគនៅក្នុងផ្លែស្វាយនោះឲ្យអស់
មុនពេលស្វាយនោះត្រូវនាំចេញទៅប្រទេសចិនបាន។
- គេតម្រូវឲ្យមានកុំព្យូទ័រសម្រាប់ Monitor
មើលកំដៅនិង Print Data ទាំងអស់ដែលទទួលបានពីអ្វីដែលយើងបានធ្វើខាងលើនេះ
ហើយចាំបាច់ត្រូវជា Data ពិតៗមិនអាចក្លែងបន្លំបានឡើយ ហើយក៏មិនអាចនិយាយរៀបរាប់ប្រាប់គេថាបានធ្វើយ៉ាងនេះយ៉ាងនោះបានដែរ
គឺត្រូវធ្វើដោយហ្មត់ចត់និងត្រឹមត្រូវទៅតាមស្តង់ដាដែលបានកំណត់ឲ្យនោះ។
៣- ការប្រើទឹកក្តៅសម្រាប់សម្លាប់រោគក្នុងផ្លែស្វាយគឺជាវិធីសាស្ត្រមួយដោយឡែកពីការធ្វើដោយ
ម៉ាស៊ីនទំនើប មានតម្លៃរាប់សែនដុល្លារនិងងាយស្រួលជាង។ ការត្រាំផ្លែស្វាយនៅក្នុងទឹកក្តៅ
48 ដឺក្រេមិនបានធ្វើឲ្យស្វាយខូចពណ៌សម្បុរឬរលួយនោះឡើយ
តែវាបានសម្លាប់មេរោគទាំងឡាយនៅក្នុងសំបក និង នៅក្នុងសាច់របស់ស្វាយលែងឲ្យមានទៀត
ដូច្នេះនៅពេលគេបន្ទំវា វានឹងមិនរលួយក្បលឬរលួយជាំលើតួផ្លែស្វាយនោះឡើយ។
៤-
ស្វាយដែលស្រង់ចេញពីទឹកក្តៅមកត្រូវដាក់សំដិលឲ្យស្ងួតតាមធម្មជាតិ មិនអនុញ្ញាតឲ្យជូតឬបាញ់ខ្យល់ក្តៅសម្រាប់សម្ងួតវាឡើយ។
៥- បន្ទាប់ពីផ្លែស្វាយស្ងួតទឹកអស់ហើយត្រូវយកវាទៅកន្លែងជម្រុះខ្នាតដោយមានខ្នាត
ស៊កផ្លែស្វាយចូល និងប្រវែងបណ្តោយរបស់ផ្លែស្វាយ បែងចែកផ្លែធំដាក់ផ្សេងដោយយោងទៅលើទម្ងន់ធ្វើជាខ្នាតធំ
ផ្លែកណ្តាលដាក់ផ្សេង ផ្លែតូចត្រូវដកចេញ (អ្នកទិញជាអ្នកកំណត់មក)
៦- ពងតូចៗរបស់ Anthranose
ត្រូវបានពិនិត្យឃើញនៅរាយប៉ាយពាសពេញផ្លែស្វាយ (សំបកក្រៅ) ដូច្នេះពេលវេលានៃការត្រាំទឹកក្រៅត្រូវបានធ្វើខ្លីជាងសម្រាប់កំចាត់
(សម្លាប់ពង Fruit Fly) នោះចោល ឯពង
(រោគ) ដែលនៅក្នុងសាច់ស្វាយវាពិបាកកំចាត់ជាង ដូច្នេះពេលវេលាត្រាំក្នុងទឹកក្តៅក៏ត្រូវយូរបន្តិចដែរ។
៧-
ការវេចខ្ចប់យ៉ាងណានោះគឺសឹងត្រូវបានតម្រូវដោយអ្នកទិញទាំងអស់ យើងជាអ្នកលក់មិនអាចធ្វើវាតាមចិត្តយើងចង់បានឡើយ
ដូច្នេះចាប់ពីពេលនេះទៅយើងអាចប្រើប្រាស់វិធីខាងលើនេះសម្រាប់គ្រប់គ្រងផ្លែស្វាយដែលបេះបានមកនោះ
ហើយទោះបីជាយើងធ្វើសម្រាប់លក់ក្នុងស្រុកក៏ដោយចុះ ក៏វាជាវិធីសាស្ត្រមួយដែលយើងគ្រប់គ្នាជាអ្នកដាំដំណាំត្រូវដឹងជាចាំបាច់ដែរ។
ម្យ៉ាងវិញទៀតនោះគឺវាបានជួយកាត់បន្ថយការខូចខាតពេលបន្ទំ យើងនិងមិនឃើញមានស្វាយទុំហើយរលួយដូចមុនទៀតឡើយ
សុវត្ថិភាពនៃគុណភាពត្រូវបានធានាទាំងស្រុង។
បំណងល្អមួយ: បេះផ្លែស្វាយរួចកុំភ្លេចកាត់មែកវាចោលឲ្យបានច្រើនដើម្បីឲ្យវាមានផ្លែផ្កាល្អជានិច្ច
និង ដើម្បីកុំឲ្យវាខ្សោយដើមអនិការលូតលាស់ មិនតែប៉ុណ្ណោះវាអាចជួយឲ្យផ្លែបានធំល្អផងដែរ៕
(ដកស្រង់ចេញពី ខេមបូឌាអេចបេ្រសញូស៍)
No comments:
Post a Comment