យើងខ្ញុំបានចេញផ្សាយរួចមកហើយស្តីពីវិធីប្រើប្រាស់ទឹកដូងនៅក្នុងអត្ថបទមួយស្តីពី 'ទឹកដូង'
នៅពេលនេះយើងខ្ញុំសូមណែនាំពីវិធីមួយចំនួន
ដើម្បីយកទឹកដមរបស់ដូង មកប្រើធ្វើជាប្រយោជន៍ និងជាចំណូលក្នុងគ្រួសារ ។
ជាទូទៅដំណាំដូងត្រូវការពេលប្រហែល
៥ឆ្នាំ ដើម្បីបានទទួលផ្លែ យើងអាចគេចចេញពីការយកផ្លែ
មកយកជាទឹកដមរបស់ដូងវិញ បើសិនយើងមានបំណងធ្វើដូច្នេះ ។
ការយកទឹកដមរបស់ដូងជាជំនួសឲ្យការយកផ្លែ
គឺជាមធ្យោបាយរកប្រាក់មួយថ្មីទៀត ដែលកំពុងត្រូវបានគេអនុវត្តនៅក្នុងប្រទេសហ្វីលីពីន
ឥណ្ឌូណេស៊ី និងប្រទេសមួយចំនួនទៀតនៅអាស៊ីយើងនេះ ។ មូលហេតុដែលនាំឲ្យគេប្តូរពីការយកផ្លែ មកយកជាទឹកដមវិញនោះ គឺមកពីតម្រូវការក្នុងទីផ្សារច្រើន
ហើយបានទទួលចំណូលច្រើនជាងការទុកឲ្យវាផ្លែ និងទទួលបានចំណូលរាល់ថ្ងៃ ។ ខុសគ្នាពីផ្លែ
ដែលយើងត្រូវរង់ចាំរហូតផ្លែនោះអាចបេះលក់បាន នេះគឺជាមូលហេតុមួយចម្បងគេ
។ អ្វីដែលជាការពិបាកបន្តិចនោះគឺ
យើងចាំបាច់ត្រូវមានដើមដូង ដែលកំពុងពេញវ័យកំពុងផ្លែ និងយ៉ាងហោចណាស់ត្រូវមានចំនួនយ៉ាងតិច
១០ដើមដែរ ។ ក្រៅពីនេះយើងចាំបាច់ត្រូវឡើងដើមដូងទាំងនោះ ដើម្បីប្រមូលយកទឹកដមដូងនោះជារៀងរាល់ថ្ងៃ
(ក្នុង ១ថ្ងៃ ចំនួន ២ដង) គឺនៅម៉ោង ៨ព្រឹក សម្រាប់យកមកធ្វើជាស្រា
ឬទឹកខ្មេះ និងប្រមូលយកម្តងទៀតនៅម៉ោង ៣រសៀល
សម្រាប់ធ្វើទឹកដូងដាក់កំប៉ុង ស្ករទឹកដូង សឺរ៉ូទឹកដូង
និងសម្រាប់ពិសារភ្លាមៗជាភេសជ្ជៈ ។ នៅពេលរសៀលទឹកដមរបស់ដូងមានជាតិផ្អែមច្រើនជាងនៅពេលណាទាំងអស់
។
សូមបញ្ជាក់ថា ការយកទឹកដូងនៅពេលល្ងាចមិនត្រូវឲ្យហួសម៉ោង ៣រសៀលឡើយ ។
គ្រឿងសម្ភារៈទាំងឡាយដែលត្រូវការចាំបាច់សំរាប់ប្រមូលយកទឹកដូងត្រូវលាងសំអាតដោយទឹកក្តៅ ដើម្បីការពារកុំឲ្យឆ្លងមេរោគ និងជាទម្លាប់នៃការមានអនាម័យល្អផង ។
ដើម្បីយកទឹកដមដូង (ដូចទឹកត្នោតដែរ) យើងត្រូវមានវិធីសាស្ត្រមួយចំនួននៃការយកវា គឺស្រដៀងគ្នាទៅនឹងការយកទឹកត្នោតដូច្នោះដែរ តែដោយហេតុថា ទឹកដមដូងងាយនឹងផ្អូម ឬជូក្នុងរយៈពេលមួយយ៉ាងខ្លីប៉ុណ្ណោះ ហេតុនេះពេលប្រមូលបានមកភ្លាមគេចាំបាច់ត្រូវដាំវាលើភ្លើង រយៈពេលកន្លះម៉ោងសិន ដើមី្បការពារវាកុំឲ្យជូផ្អូម ។
ក្នុងករណីដែលយើងចង់ផឹកទឹកដូងនោះ យើងអាចផឹកវាបានភ្លាមៗ ដោយគ្រាន់តែកំដៅវាក្នុងទឹកក្តៅពុះចំនួន ៥-១០ នាទីសិន ដើម្បីសម្លាប់មេរោគ បន្ទាប់មកយើងអាចច្រកវាដាក់ដបបិតឲ្យជិតបំផុតរួចដាក់វាក្នុងទូទឹកកកទុកពិសានៅពេលក្រោយ ។
ដើមី្បយកទឹកដមដូង:
យើងត្រូវមានបំពង់មួយ ខ្សែ ឬកៅស៊ូរឹតកាំបិតមុតមួយដូចកាំបិតបន្ទោះដែរ តែធំជាង ។
សមឹ្លងរកមើលខ្ពរស្នែងដូងណាមួយ ដែលមានលើដើម ដែលបានលូតចេញមក ហើយចាប់ផ្តើមប៉ោងផ្នែកកណ្តាល យកកាំបិតកាត់ផ្នែកខាងចុងខ្ពរដូងប្រវែង ១ចំអាមចូលក្នុងត្រូវកាត់មុខវាឲ្យស្អាត យកខ្សែ ឬកៅស៊ូរឹតកងរុំខ្ពរដូងនោះចាប់ពីគល់ខ្ពររហូតដល់ផ្នែកដែលបានកាត់ ដើម្បីការពារកុំឲ្យវារីកលាតចេញជាស្នែងបែកក្រញាស់នៅពេលក្រោយ យកបំពង់មកស៊កត្រង់ផ្នែក ដែលបាននោះចូលឲ្យជ្រៅនៅក្នុងបំពង់គឺប្រហែល 2/3 នៃបំពង់ ។ ប្រើថង់ប្លាស្ទីកមួយធំវែងល្មមអាចស៊កបំពង់ទាំងមូលនេះបាន រួចចងមាត់ថង់ឲ្យជាប់ល្អ ។
យកខ្សែមកចងពាក់កណ្តាលបំពង់ទាញរឹតវាចុះក្រោម ដើមី្បឲ្យគូថបំពង់ទាបជាងមាត់បំពង់ឲ្យបាន ៣០ដឺក្រេ ឬច្រើនជាងនេះ តែត្រូវប្រយ័ត្នកុំឲ្យបាក់គល់ខ្ពររបស់វា ធ្វើដូច្នេះចំពោះខ្ពរផ្សេងៗទៀតក្នុងដើមតែមួយ បើមានច្រើនត្រូវធ្វើទាំងអស់ ។ យើងអាចទុកខ្ពរណាមួយឲ្យវាចេញជាផ្លែក៏បានតាមត្រូវការ ។
យើងត្រូវភ្លក្សគ្រប់ដើមទាំងអស់ និងបាញ់ថ្នាំសំគាល់តាមដើមដូងមួយណា ដែលមានរសជាតិផ្អែម យើងទុកធ្វើស្ករ និងសម្រាប់ធ្វើភេសជ្ជះ ឯដើមណាដែលមានទឹកសាប យើងសម្រាប់ធ្វើជាទឹកខ្មេះ ឬទឹកដូងជូ (ដូចទឹកត្នោតដែរ) ឯវិធីធ្វើគឺដូចគ្នា ។
ស្ករដូងមានតម្លៃថ្លៃជាងស្ករត្នោត និងមានទីផ្សារយ៉ាងធំនៅសហរដ្ឋអាមេរិក តែយើងត្រូវមានចំនួនយ៉ាងច្រើនសម្រាប់បំពេញតាមការបញ្ជាទិញរបស់គេ និងត្រូវមានម៉ាកយីហោ និងវេចខ្ចប់បានត្រឹមត្រូវតាមការបញ្ជារទិញ៕
(ដកស្រង់ចេញពី ខេមបូឌាអេចបេ្រសញូស៍)
No comments:
Post a Comment